أول تعليق.. علا شوشة تفضح كواليس مواجهة «أم مكة» وتكشف ما لم يُعرض!
في أول تصريح لها بعد الأزمة التي أثارت جدلًا واسعًا على مواقع التواصل الاجتماعي، خرجت الإعلامية علا شوشة عن صمتها، وكشفت في تصريح خاص لموقع "نيوز رووم" كواليس ما حدث بينها وبين صانعة المحتوى المعروفة بـ"أم مكة"، خلال تصوير إحدى حلقات برنامجها "الشفرة".
"سألتها باحترام.. لكنها فاجأتني برد فعل غير متوقع"
وقالت شوشة:"استضفت أم مكة وتعاملت معها بكل ذوق وأخلاق، زي ما بتعامل مع كل ضيوفي سألتها أسئلة مهذبة وباحترام تام، وكنت متوقعة إننا نعمل فقرة محترمة، نعرف فيها كل الإجابات اللي الناس مستنياها، لكن اتفاجئت برد فعلها اللي مكنتش متوقعاه خالص."
"أسئلتي دايمًا مهنية.. وده أسلوبي المعروف"
وأضافت:"أنا طريقتي في توجيه الأسئلة واضحة ومعروفة، وكل اللي يعرفني عارف إن أسئلتي دايمًا مهنيّة وبراعي فيها الذوق، وعمري ما تجاوزت حدودي دي مدرستي في الإعلام."
الحلقة مؤجلة.. وما حدث موثّق بالكامل
وأكدت شوشة أن الحلقة لم تُذَع بعد، وتم تأجيل عرضها إلى حين الانتهاء من التحقيقات، مشيرة إلى أن كل ما حدث موثّق بالصوت والصورة.
وأكملت: "المشكلة مش في الأسئلة، المشكلة إنها بعد ما جاوبت، يمكن حسّت إن إجاباتها مش دقيقة أو مش معبّرة بالشكل اللي كانت تقصده، فقامت بافتعال مشكلة في محاولة لوقف استكمال الحلقة أو منع عرضها."
"مفيش خلاف شخصي.. وكل الأسئلة كانت عن القضية"
وتابعت:"هي قالت وقت التصوير إنّي بفكرها بخلاف قديم، وإنها حاسة إني طالبة منها تعتذرلي، وده غير حقيقي تمامًا مفيش أي خلاف شخصي، وكل الأسئلة كانت في إطار الأزمة الأخيرة اللي الناس كلها بتتكلم عنها."
"الناس شافت الفيديو.. وتحكم على الأسلوب"
وبخصوص الفيديو المتداول، أوضحت شوشة:"هي اللي قالت إنها هتنسحب احترامًا للفنانة وفاء عامر، لكن طريقة كلامها كان فيها ترغيب وترهيب واضح، وده السبب اللي خلاني أذيع المقطع، عشان الناس تشوف أسلوبها ويقارنوا بين طريقتها وطريقة تعاملنا كفريق بكل احترام وهدوء."
"بحيي الداخلية.. والحملة هتغير شكل المحتوى على تيك توك"
واختتمت شوشة حديثها بالإشادة بخطوة وزارة الداخلية في ضبط عدد من صانعي المحتوى غير الهادف على تيك توك، قائلة:"اللي حصل خطوة رائعة من الداخلية، وده نتيجة لتضافر جهود كتير، من مؤسسات الدولة، إعلام ومحامين وشخصيات عامة وأسر مصرية، والحملة دي هتأثر فعلًا على كل اللي بيستخدم تيك توك، وهتخليهم يعيدوا التفكير في نوع المحتوى اللي بيقدموه."
