أهالي كفر طهرمس وفيصل يصرخون: "بنشرب مياه مجاري.. ومحدش بيسمعنا"|فيديو
في استغاثة جديدة تنضم لسلسلة معاناة المواطنين مع نقص الخدمات الأساسية، كشف عدد من سكان منطقتي كفر طهرمس وشارع مخلوف بفيصل، عن تدهور أوضاع مياه الشرب التي تصلهم، سواء من حيث الانقطاع لساعات طويلة يوميًا أو من حيث التلوث الشديد الذي وصفوه بأنه "أقرب لمياه الصرف الصحي".
مراسل "نيوز رووم" التقى بعدد من الأهالي الذين عبّروا عن غضبهم واستيائهم من تجاهل الجهات المسؤولة لمعاناتهم المستمرة منذ شهور، وسط غياب أي تحرك فعلي أو استجابة واضحة من الجهات المعنية.
قال أحد سكان كفر طهرمس في تصريح خاص:
"المياه بتيجي الساعة 6 الصبح لحد 11، وبعد كده تقطع تاني. في ناس عندها إمكانيات تشتري مياه معدنية، وفي اللي بيخزن مياه في الفترة اللي بتكون فيها شغالة.. بس حتى كده ما بتكفيش. أنا بفضل عطشان ومش عارف أتوضى، نفسي صوتي يوصل للمحافظ، بجد بقينا بنشرب مياه شكلها ورائحتها زي المجاري".
أما الوضع في شارع مخلوف بمنطقة فيصل، فليس أفضل حالًا، حيث يقول أحد السكان:
"بقالنا سنة ونص بنشرب مياه ملوثة، والله زي المجاري بالظبط. مش عارفين نعيش، بقينا بنسيب بيوتنا ونبات عند ناس تانية في مناطق تانية فيها مياه نظيفة، بس لحد إمتى؟ كأننا في صحراء مش في قلب القاهرة!".
وأضاف: "اتصلنا بشركة المياه، وقدمنا شكاوى كتير، وكل مرة نفس الرد: (الموضوع تحت الفحص)، طب لحد إمتى؟ هو الحل إننا نموت ولا نروح نعيش في الترب؟".
المشكلة لا تقف فقط عند عدم توافر المياه أو تلوثها، بل تمتد إلى تأثيرها المباشر على الصحة العامة، خصوصًا للأطفال وكبار السن، وسط مخاوف من انتشار أمراض الفشل الكلوي والفيروسات المعوية.
"نيوز رووم" تواصل مع أحد العاملين بشركة مياه الجيزة، والذي رفض ذكر اسمه، مؤكدًا أن هناك خطة تطوير للبنية التحتية في بعض المناطق، ولكن الأمر "يحتاج وقتًا"، وهو ما لا يرضي الأهالي الذين باتوا يعتبرون كل يوم تأخير بمثابة تهديد مباشر لحياتهم.
في انتظار تحرك سريع من محافظة الجيزة وشركة المياه، تبقى معاناة المواطنين في كفر طهرمس وفيصل مستمرة، في واحدة من أبسط حقوق الإنسان: الحصول على مياه نظيفة وآمنة.
