امتداد لفكر الإخوان.. دعوة للاحتجاج أمام سفارة مصر في تل أبيب
أثار إعلان متداول لرئيس اتحاد أئمة المساجد في الداخل الفلسطيني، الشيخ نضال أبو شيخة، لتنظيم مظاهرة أمام السفارة المصرية بتل أبيب، ردود فعل غاضبة وعاصفة من الجدل على مواقع التواصل الاجتماعي.
واجهت الدعوة إلى الاحتجاج سخرية واستنكارًا واسعًا، خاصة أنها جاءت للتظاهر من أرض محتلة وتحت علم الاحتلال، ضد دولة عربية لا تزال تسعى لوقف المجازر ودخول المساعدات.
يرصد “نيوز رووم” في التقرير التالي ردود الأفعال حول دعوة التظاهر المتداولة على منصات التواصل
انتقادات لاذعة.. دعم لرواية الاحتلال وتبرئة لحماس
كتب المخرج محمد أمير عبر صفحته على موقع التواصل الاجتماعي “فيسبوك” ساخرًا: “الصنف ده عالي جدا يا جماعة وطبخ ايد والتر وايت شخصيا”.
وعلق الناشط أيمن عيسي قائلًا: “اتحاد أئمة المساجد الفلسطيني هيتظاهر أمام سفارة مصر اللي بيضربكم إسرائيل.. اللي بيحكمكم حماس.. وأنت لما ييجي لك فرصة تتظاهر في تل أبيب.. تخليها احتجاج على مصر يا شيخ.. مصر اللي بتحاول تساعدكم في ظروفها الصعبة على كل المستويات”.
وأضاف: “مصر رافضة التعامل مع الاحتلال في معبر رفح من الجانب الفلسطيني.. لأنه وفقًا لاتفاقية المعاير من عشرين سنة لا يحق للاحتلال التواجد في المعبر، اللي هو بالأساس مدمر بالكامل أصلًا من الجانب بتاعكم.. مصر بتحاول تدخل مساعدات من معبر كرم أبو سالم".
وتساءل: "مصر رافضة التهجير وتصفية القضية.. مطلوب من مصر إيه؟ انتوا بتدعموا رواية الاحتلال اللي هو بيضرب فيكم.. وبتبرأوا اللي حكموكم وضيعوكم، والكلام دلوقتي بقى عن مصر.. ماهو التهجير مش هييجي بالابتزاز والضغط أئمة المساجد قاعدين زي الحريم ليه؟.. هي فين المساجد اللي هتخطبوا فيها؟.. ملكوش شغلانة خلاص.. الحرب أولى بكم روحوا الحرب دافعوا عن شرفكم وعرضكم وأرضكم.. روحوا حاربوا المحتل بدل محاربة مصر، اللي هي لا خططت ولا شاركت ولا حكمت ولا ليها علاقة بالأمر… انت محكوم من فصيل أحمق ضيّعك.. ليه تسيب اللي حاكمك واللي ضاربك ومحتلك وتمسك في اللي بيحاول يساعدك ؟
وتابع: “مصر لن تدخل حروبًا دفاعًا عن أحد.. ومصر أولويتها حماية حدودها الملتهبة على كل الاتجاهات ومصر أولويتها حماية مائة مليون، ولن تضيعهم دفاعًا عن اتنين مليون محكومين من حمقى مصر لن تقبل التهجير، لأنه ضياع وتصفية للقضية.. استدعوا خليل الحية وكل حية أوصلكم إلى هذا الوضع، وحاربوا مثل الرجال.. ولا تقعدوا وتضغطوا وتبتزوا مثل إخوانكم في الدوحة… الابتزاز لن يفيد”.
دعوة مظاهرة ضد مصر في تل أبيب.. غضب وسخرية ومطالب بالمحاسبة
بينما علق الكاتب محمد أمير كتب: "أعبث حاجة شفتها النهاردة بل اعبث حاجة شفتها في التاريخ!!! الشيخ نضال أبو شيخة رئيس اتحاد المساجد في عرب الداخل والمحامي خالد زبارقة تقدموا بطلب رسمي لحكومة "تل ابيب" لتنظيم مظاهرة احتجاجية قدام السفارة المصرية يوم الخميس الجي الساعة ٢ الظهر للهتاف ضد مصر!! حاولت أقنع نفسي إن الخبر ده نكتة أو صورة فوتوشوب للاسف لحد دلوقتي الكلام بجد، فيه واحد راح يستأذن تل ابيب اللي هيا اللي محاصرة اهالينا اصلا عشان يتظاهر ضد مصر من جوا العاصمة انتا فاهم العبث؟ أتمنى أن الصورة دي تبقا مش حقيقية والله عشان كدة بقا دليل ملموس ان فيه حاجة بتترش في الجو مخلية دماغ الناس كفتة".
بينما قال مختار نوح: وحتى شعب إسرائيل والصهاينة وعرب 48 عملوا مظاهرة في تل أبيب حاصروا فيها السفارة المصرية عشان يطالبوها بفتح معبر رفح الإسرائيلي شوفت الاستخفاف بعقول الشعوب.. المظاهرة الجاية هتكون أكيد بزعامة نتنياهو".
من جانبه علق عمرو الجزار ساخرًا: شوف الكوميديا السودة دي: الشيخ نضال أبو شيخة، رئيس اتحاد أئمة المساجد في الداخل الفلسـ.طيني، رايح يتظاهر يوم الخميس قدّام السفارة المصرية في تل أبيب! آه والله… في تل أبيب! مش قدّام سفارة الاحتلال اللي بيقتل في أهل غـ زة، لا، دي مصر هي العدو في دماغه! مش شايف إن إسـرائيل هي اللي قافلة كل المعابر الباقية؟ مش شايف إن الجيش الإسـ ـرائيلي بيقصف وبيمنع الإغاثة؟ مش شايف إن مصر بتدخل مساعدات يوميًا رغم المخاطر؟ يعني حضرتك شايف إنك تتظاهر على أرض محتلة تحت علم الاحتلال ضد مصر… ومش شايف أي تناقض؟ بتشتغلوا لمين بالظبط؟ مين المستفيد من المسرحية دي؟ مصر طول الوقت بتتحمل فوق طاقتها، ومفتوحة للمساعدات رغم التهديدات وبتقاوم مخطط تهجيركم اللي أنتم نفسكم بتسهلوه بالشو الإعلامي ده".
