سهير جودة تطمئن الجمهور: لطفي لبيب بخير وابتسامته رجعت تاني
عبّرت الإعلامية سهير جودة عن مشاعرها الصادقة تجاه الفنان القدير لطفي لبيب، قائلة:"في ناس وشهم بينطق حتى لو ما اتكلموش، ناس من كتر ما هما غاليين علينا، بنحس إنهم من عيلتنا، ولطفي لبيب واحد من الوشوش اللي لما تغيب، بنسأل عليهم، ولما تمرض، بنقلق، ولما يضحك، نحس إن الدنيا لسه بخير".
"لطفي لبيب مش فنان وبس... ده عشرة وراجل محترم"
واصلت سهير حديثها خلال برنامجها "الستات" المذاع عبر قناة النهار :"هو مش بس فنان قدير، ده إنسان بكل معنى الكلمة حضوره طاغي، وضحكته صافية، بيضحكك من قلبك من غير ما يتكلف، بيخطفك بطيبة وشه قبل فنه يكفي يعرف إنه بطل من أبطال أكتوبر، راجل عاشق للبلد دي، وفنه كان دايمًا في خدمتها".
"أزمة صحية ودعم الأب بطرس دانيال"
وتحدثت سهير عن تفاصيل الأزمة الأخيرة:"الناس كلها قلقوا عليه بعد ما عرفوا إنه دخل المستشفى بسبب وعكة صحية، وده الطبيعي، لأنه غالي علينا، لكن كالعادة، الأب بطرس دانيال كان أول الناس اللي راحوا له وسندوه الأب بطرس دايمًا في ضهر الفنانين، بيهتم بيهم وبيتابعهم وبيشاركهم أي لحظة صعبة".
"الابتسامة رجعت... والقلوب ارتاحت"
وأضافت:"وشفنا صورة جميلة، طمنت قلوبنا، فيها الفنان لطفي لبيب في بيته، ووشه منور وبيضحك، ومعاه الأب بطرس دانيال والنجم حمزة العيلي الصورة دي قالت كل حاجة من غير ما حد يتكلم، قالت إنه بخير وبيتعافى، وربنا يتمم شفاءه على خير".
"الأب بطرس... أب وسند لكل فنان في لحظات ضعفه"
واختتمت سهير جودة حديثها برسالة تقدير:"أنا بقول دايمًا إن الأب بطرس أب روحي وسند لكل فنان بيجري على اللي محتاجه، وبيطمن الناس بكلمة وصورة وموقف وجوده جنب لطفي لبيب مش بس طمنه، لكن طمنا كلنا... الفنانين دول عشرة عمر، وناس بيعيشوا معانا، ويستاهلوا نكون دايمًا معاهم".
وفي وقت سابق ،كشف الفنان لطفي لبيب تطورات حالته الصحية بعد خروجه من المستشفى اليوم الجمعة، بعد الوعكة الصحية التي مر بها ونُقل على إثرها للمستشفى الأحد الماضي.
وقال لطفي لبيب في تصريحات لـ نيوز رووم: “أنا كويس.. ولكن الأطباء مانعني من الكلام، ومش قادر أتكلم، وبشكر حمزة العيلي والأب بطرس دانيال على زيارتهم لي في منزلي”.
