رضوى الشربيني تكشف معايير اختيار "الصحبة الصح": مش كل واحدة بتضحك تبقى صاحبتك

في فقرة "اسأل رضوى" من برنامجها الأسبوعي على قناة "دي إم سي"، ردّت الإعلامية رضوى الشربيني على سؤال إحدى المتابعات حول كيفية اختيار الصديقة الحقيقية أو "الصحبة الصح"، لتوضح أن الموضوع لا يخضع لوصفة جاهزة، وإنما لمعايير تظهر مع الوقت والمواقف.

الوقت والمواقف هما المعيار 

بدأت رضوى الشربيني حديثها قائلة: "مافيش وصفة للموضوع ده... لكن أي شخص نقدر نحكم عليه إنه كويس لما يعدي على وقت ومواقف".

وشددت رضوى الشربيني على أن الصديقة الحقيقية تظهر في المواقف الصعبة، حين ترى إن كانت ستقف بجانبك وقت الشدة أم لا.

كلام الناس عن صاحبتك 

أشارت رضوى الشربيني إلى أهمية ما يُقال عن الشخص في غيابه، وشرحت قائلة: "بشوف الناس بتقول إيه عن البنت دي، خاصة لما أكون مش موجودة .. ساعات ناس تبين إنها بتحبك بالكلام، وتبقى أول واحدة بتتكلم عليك من وراك".

وروت رضوى الشربيني موقفًا شهيرًا: "تلاقيها بتقولك: نون، حبيبتي، وحشتيني! وبعد دقيقة تقول: عارفين البنت دي كانت متجوزة مين؟!"، معتبرة أن هذه التصرفات تسقط صاحبها فورًا من قائمة "الصحاب".

العطاء المتبادل يفرق

عن العطاء الحقيقي، قالت رضوى الشربيني: "الصاحبة الصح بتدي ومش مستنية تاخد... مش بتسلفك 1000 جنيه ومستنية الشهر الجاي تسلفيها زيهم"، مضيفه: "مش لما تقولي مش معايا فلوس تجيبلي هدية عيد ميلاد، تعمل بوز وتمشي... الصاحبة تفهم وتعذر وتدّي من غير حساب".

وركزت رضوى الشربيني على قيمة المجاملة البسيطة بين الصديقات، قائلة: "مش الست بس اللي تستنى الراجل يهديها .. الست كمان تحب صاحبتها تفكر فيها، حتى لو بوردة"، وأكملت: "لما تكوني نازلة تشتري حاجة وتفتكري صاحبتك، وتجيبلها حاجة بسيطة وتقوليلها: خدي يا حبيبتي، دي ليكي".

التشابه الأخلاقي والخلفية 

واعتبرت رضوى الشربيني أن الانتماء لنفس "الحكاية" ضروري جدًا بين الأصدقاء، موضحة: "ما ينفعش تكون صاحبتك تصرفاتها بعيدة عنك، أو قيمها مختلفة، لأنك هتحسي إنك مش في مكانك"، موضحه: "لو كل شوية بتعمل حاجة إنتي ما بتحبيهاش، هتحسي بعدم راحة طول الوقت.. فده مؤشر مهم إنها مش من دايرتك".

وختمت رضوى الشربيني حديثها بتلخيص المعايير الأساسية لاختيار "السحبة الصح" في ستة نقاط: "الوقت والمواقف، كلام الناس عنها في غيابك، طبيعة كلامها عنك لما تكوني مش موجودة، العطاء من غير شرط أو مقابل، المجاملة والتقدير حتى لو بهدية بسيطة، الانسجام الأخلاقي والتشابه في المبادئ".

مؤشرات صديقة حقيقية

رسالة رضوى الشربيني الأخيرة كانت واضحة: "مش كل واحدة تضحكلك تبقى صاحبتك... الصحبة الحقيقية محتاجة فلترة ومعايير، مش مجرد خروج وسيلفي".